29 ნოემბერს განათლების ხარისხის განვითარების ეროვნულ ცენტრში გაიმართა განათლების მიმართულების უმაღლესი განათლების დარგობრივი საბჭოს მასწავლებლის მომზადების დარგობრივ მახასიათებელზე მომუშავე, „ზოგადი კომპეტენციების შემმუშავებელი“ ჯგუფის მორიგი შეხვედრა.

სამუშაო ჯგუფის შეხვედრა გაფართოებული შეხვედრის ფორმატში წარიმართა. საბჭოს წევრებისა გარდა, სამუშაო ჯგუფის მუშაობაში აქტიურად ჩაერთნენ მოწვეული სტუმრებიც: უმაღლესი საგანმანათლებლო დაწესებულებების, სამეცნიერო-კვლევითი ინსტიტუტების, საქართველოს განათლებისა და მეცნიერების სამინისტროს, ეროვნული სასწავლო გეგმების სამმართველოს, მასწავლებელთა პროფესიული განვითარების ეროვნული ცენტრის, კერძო სკოლების ასოციაციის მიერ რეკომენდებული დარგის მაღალკვალიფიციური სპეციალისტები.

მასწავლებლის მომზადების უმაღლესი განათლების დარგობრივი მახასიათებლის შემუშავების საკითხის აქტუალობის გათვალისწინებით, აგრეთვე, შემუშავება-განხილვის პროცესში დაინტერესებულ მხარეთა ფართო ჩართულობის ხელშეწყობის მიზნით, ინფორმაცია სამუშაო ჯგუფების მუშაობის თაობაზე კვლავ აიტვირთება ცენტრის ვებგვერდზე, რაც შესაძლებლობას მისცემს ყველა დაინტერესებულ პირს, მისი კომპეტენციის ფარგლებში, მიიღოს მონაწილეობა სამუშაო ჯგუფის შეხვედრასა ან/და შექმნილი პროდუქტის საჯარო განხილვაში და საკუთარი წვლილი შეიტანოს დარგობრივი მახასიათებლის შემუშავება-განხილვის პროცესში.